ခင်ဗျားလေးကို ပျော်အောင်ထားဖို့ အများကြီးကြိုးစားရဦးမယ် ။
ရှင်လေးက မိသားစုထဲမှာ အငယ်ဆုံးသမီးလေး မဟုတ်လား အများကြီး အလိုလိုက်ခံထားရတဲ့ ကလေးလေးတစ်ယောက်လေ ... အသက်အရွယ်ကို ကြည့်ရင် လူကြီးတစ်ယောက်ပေါ့ ဒါပေမယ့် ကလေးစိတ်လေးနဲ့ လူတစ်ယောက်ပဲလေ အများကြီး အချစ်ခံချင်တယ် အများကြီး အလိုလိုက်ခံချင်တယ် ပြီးတော့ ဘယ်နေရာမှာမဆို ပထမ ရချင်တယ် မဟုတ်လား ။
အဖေ့ရဲ့ သည်းသည်းလှုပ်ချစ်ခြင်းခံရတဲ့ မင်းသမီးလေး တစ်ပါးလေ ... ကျွန်တော့်လက်ထဲရောက်မှ မပျော်တော့လို့ ဘယ်ဖြစ်ပါ့မလဲ ။ အဖေကလေ ... ကျွန်မကို သိပ်ချစ်တာဆိုပြီး စကားတွေ အစချီပြီး ဘယ်လောက်ချစ်တာဆိုတာနဲ့ အဆုံးသတ်တတ်တယ် မဟုတ်လား ... ကျွန်တော်အဲ့လောက် မချစ်ပေးနိုင်မှာစိုးတယ် ။ အဲ့လို ပျော်အောင် ထားမပေးနိုင်မှာကို ကြောက်တယ် ။ ပြီးတော့ ... ဒီကလေးလေးက တစ်ခုခုကို တွယ်တာမိသွားရင် ဆုံးရှုံးရမှာ အရမ်းကြောက်တတ်တာ မဟုတ်လား ။
ပျော်အောင်ထားပေးချင်ခဲ့တဲ့သူပါ ... ဒါပေမယ့် နာကျင်စေမိသွားမှာကို ကျွန်တော် ကြောက်နေတယ် ပြီးတော့ ကျွန်တော့်ကြောင့် မျက်ရည်ကျသွားမှာကို ကြောက်နေမိတယ် ။ ခင်ဗျားလေး မြင်နေခဲ့တဲ့ ကျွန်တော့ရဲ့ တစ်ဖက်က သာနေတဲ့ လလိုပါပဲ လင်းလက်နေတာကိုပဲ မြင်တာပါ တစ်ဖက်မှာ ခက်ခဲခြင်းတွေ အများကြီးနဲ့ ပြီးတော့ အဆင်မပြေခြင်းတွေ အများကြီးနဲ့လေ ။ လူတစ်ယောက်ကို အမြဲတမ်းပျော်အောင် ထားနိုင်ဖို့ဆိုတာ မလွယ်ဘူး မဟုတ်လား ။
အခြေအနေတစ်ခု လိုတယ် ။ အချိန်ပေးဖို့လိုတယ် ... ကျွန်တော်ကလေ ခင်ဗျားကို ပျော်စေချင်တယ်ဆိုတဲ့ ဆုတွေ တောင်းပေးချင်ခဲ့တဲ့ လူတစ်ယောက်တော့ မဟုတ်ပါဘူး ပျော်အောင် ထားပေးချင်ခဲ့တဲ့ လူတစ်ယောက်ပါ ။ ကလေးဆန်လွန်းတဲ့ မင်းကို မျက်နှာလေး စူပုတ်မသွားအောင် ထားချင်တယ် မျက်နှာလေး ညိုးမသွားအောင် အရိပ်တကြည့်ကြည့်လေး ကြည့်နေချင်မိတယ် ။
ကျွန်တော် အများကြီး ကြိုးစားရဦးမယ် ... မင်းအနားနေနိုင်ဖို့ ခြေလှမ်းတွေ အများကြီး လှမ်းရဦးမယ် ။ သိပ်အချစ်ခံရတဲ့ ကလေးက သူ့ကို သိပ်ချစ်တဲ့ လူကို အမြဲ အမှတ်ရနေတတ်သလိုပဲ ကျွန်တော့ကို ခင်ဗျားလေး အမှတ်ရနေစေဖို့ ကျွန်တော် တကယ် အများကြီး ကြိုးစားရဦးမယ် ။ ငိုနေတဲ့ မျက်ရည်တွေကို သုတ်ပေးဖို့ အကြင်နာတွေ အများကြီး ရှိနေပြီးသားပါ အေးစက်မာကျောနေတဲ့ နှလုံးသားလေးနွေးဖို့ အချစ်တွေ အကုန်ပေးခဲ့ပြီးသားပါ ။ ဒါပေမယ့် ခင်ဗျားလေးကို ပျော်အောင်ထားချင်တယ်ဆိုတဲ့ အိပ်မက်လေး ပြည့်ဖို့တော့ ကျွန်တော် အများကြီး ကြိုးစားရဦးမယ် ထင်ပါတယ် ။
ပြုံးနေပါ ကလေးရေ ... ပြီးတော့ ပျော်အောင် နေနော် ... ကျွန်တော့်ကြောင့်လဲ အပင်ပန်းမခံနဲ့ ကျွန်တော့်ကြောင့်လဲ ဘာမှ ပြောင်းလဲဖို့ မတွေးနဲ့ ။ မင်းဆိုးချင် ဆိုးလို့ရတဲ့ လူတစ်ယောက် အဖြစ်ရှိနေပေးမယ် မင်း ငိုချင် ငိုချရလောက်တဲ့အထိ ယုံကြည်ရမယ့် လူတစ်ယောက် ဖြစ်နေပေးမယ် ။ တတိုင်း ရှိနေပေးဖို့ အလုပ်တွေအများကြီး ကြိုးစားမယ်လေ ။ ပျော်အောင်ပဲ နေပါ နေကောင်းကျန်းမာအောင်ပဲ နေပါ ။
Comments
Post a Comment