နေပြည်တော်ကို အလုပ်ကိစ္စ၊ အလည်ပတ်စသည်ဖြင့် အကြောင်းအမျိုးမျိုးနဲ့ ရောက်လာကြတဲ့ မိတ်ဆွေတွေ အမြဲတမ်းမေးနေကျ စကားရှိပါတယ်။ နေပြည်တော်မှာ ဘယ်တွေသွားလို့ရလဲ ဆိုတာပါပဲ။ ၁၃ နှစ် သက်တမ်း ရှိလာတဲ့ နေပြည်တော်ဟာ အခုဆိုရင် သွားလာလည်ပတ်လို့ ကောင်းတဲ့ နေရာတွေ ပိုပိုပေါလာပါပြီ။
များသောအားဖြင့်တော့ နေပြည်တော်ဟာ မြို့သစ်အဖြစ် ဖော်ထုတ်ခဲ့တာကြောင့် မြို့ပြအဂါၤနဲ့ ညီအောင် အရာရာ အသစ် တည်ဆောက်ခဲ့တာ ဆိုပေမယ့် နှစ်ပေါင်းရာချီနေတဲ့ ရန်ကုန်၊ မန္တလေးမြို့ကြီးတွေနဲ့ ယှဉ်ရင် သွားလာ လည်ပတ်စရာကတော့ နည်းသေးတာ အမှန်ပါပဲ။ ဒါပေမယ့် အခု ဆယ်စုနှစ် တခုကျော် အချိန်မှာတော့ နေပြည်တော်ဟာ မြို့ပြတခုအဖြစ် အသား နည်းနည်းကျလာတဲ့ နည်းတူ၊ သွားလာ လည်ပတ် လေ့လာစရာ နေရာလေးတွေ ပိုပို များလာပါတယ်။
ဆယ်စုနှစ်ကျော် ကာလအတွင်းမှာ ကြီးထွားလာတဲ့ သစ်ပင်ပန်းမာန်ေတွေကြောင့်လည်း နေပြည်တော်မှာ ရာသီဥတုက အရင် နှစ်ပေါင်းများစွာကလို ဆိုးရွားလွန်းတဲ့ အနေအထားကနေ တဖြည်းဖြည်း သက်တောင့် သက်သာ နေလို့ကောင်းတဲ့ အနေအထားကို ရောက်လာပြီလို့ ပြောလို့ရပါတယ်။
ဘယ်နေရာသွားသွား အခုလိုမိုးရာသီမှာ စိမ်းစိုနေတဲ့ သစ်ပင်တွေ၊ အုံ့ဆိုင်းနေတဲ့ အပင်ကြီးတွေကြောင့် အပူဒဏ် သက်သာလာသလို၊ မိုးလည်း ရန်ကုန်လောက် မများပေမယ့် နေသာထိုင်သာ ရှိအောင်သာ ရွာချတာကြောင့် စိတ်ပျက်လောက်အောင် စိုစွတ်မနေပါဘူး။ ဆောင်းရာသီ အဝင်မှာလည်း ရာသီဥတု အေးအေးကြောင့် ဆောင်းရာသီဆိုတဲ့ ဥတုအရသာကို ခံစားနိုင်ပါတယ်။ နွေရာသီကတော့ တမြို့လုံးမှာ ရောင်စုံပန်းတွေနဲ့ အတော် သာယာတယ်လို့ ဆိုရမှာပါ။
လေကောင်းလေသန့်ရပြီး၊ ရေကြီးရေလျှံမှုတွေ မရှိတာ၊ ကားကြပ်တည်းမှုတွေ မရှိတာနဲ့ နေပြည်တော်ဟာ အခုအချိန်မှာတော့ အေးအေးဆေးဆေး နေချင်သူတွေအတွက် မျက်စိကျစရာ နေရာဖြစ်စ ပြုလာပါပြီ။ ဒီတော့ နေပြည်တော်မှာ ခဏတဖြုတ် လာရောက်ကြတဲ့ သူတွေအတွက် သွားလာ လည်ပတ်စရာ နေရာတချို့ကို လမ်းညွှန် ပြောပြချင်ပါတယ်။
သဘာ၀ ပတ်ဝန်းကျင်ကို ကြိုက်နှစ်သက်သူတွေ အတွက်၊ ဘာသာရေးနဲ့ ပတ်သက်ပြီး ရှေးဟောင်း ဘုရားတွေ လည်ပတ်ချင်သူတွေ အတွက်၊ ဓာတ်ပုံလှလှ ရိုက်ချင်ကြသူတွေ အတွက် ကိုယ်ကြိုက်နှစ်သက်ရာကို သွားရောက် လည်ပတ်နိုင်မှာပါ။
နောက်တစ်ပတ်မှာ နေပြည်တော်ရဲ့ လည်ပတ်စရာ နေရာများကို ဆက်လက်ပြောပြသွားမှာ ဖြစ်ပါတယ်
Comments
Post a Comment