မင်းနဲ့ နီးချင်တယ် ဒါမှမဟုတ် မင်းနဲ့ ဝေးချင်တယ် ။
ဆုတစ်ခုပဲတောင်းပါဆိုရင်လေ မင်းနဲ့ နီးချင်တယ်ဆိုတဲ့ ဆုတစ်ခုကိုပဲတောင်းချင်တယ် တကယ်လို့ လုံး၀မဖြစ်နိုင်ဘူးဆိုတဲ့ အဖြေတွေရလာရင်လဲ ဘယ်တော့မှ မဆုံနိုင်အောင် ဝေးချင်တယ်ဆိုတဲ့ ဆုတစ်ခုကိုပဲ လိုချင်မိမယ်ထင်ပါတယ် ။ ဘာကြောင့်လဲ မေးရင် ကျွန်တော်က အရမ်းကို တွယ်တာတတ်လို့ပါဆိုတဲ့ အဖြေပဲ ပေးရတော့မယ်ထင်ပါတယ် ။
မင်းကို မြင်နေရင် မင်းကို မချစ်ပဲနေနိုင်မှာလဲ မဟုတ်ဘူးလေ မင်းကိုတွေ့နေရရင် မင်းနဲ့စကားမပြောပဲ နေချင်မှာလဲ မဟုတ်ဘူးလေ မီးစိမ်းလေးတွေ တွေ့နေရရင် ကိုယ်ဟာ အပြေးလေးစကားပြောချင်နေမိဦးမှာပါပဲ ။ မင်းပျော်နေတာတွေ့ရင် သူလဲ ပျော်နေတာပဲဆိုတဲ့အသိနဲ့ မပျော်တဲ့ ကိုယ့်ကိုယ်ကိုယ် အတင်းကြီး ရီမောခိုင်းရဦးမယ် မဟုတ်လား ။
မင်းနဲ့လေ ... အနီးကပ်ဆုံးမှာနေချင်တယ် ။ ဘာလုပ်နေလဲလို့ မေးစရာမလိုအောင် ဘာပဲလုပ်လုပ် မျက်စိအောက်မှာ ရှိနေတဲ့အထိ ကျွန်တော် ခင်ဗျားနဲ့ နီးချင်တယ် ။ ဘာစားပြီးပြီလဲ မေးစရာတွေ မလိုအောင် ။ အဆင်ပြေရဲ့လားဆိုပြီး မေးဖို့မလိုအောင် အဆင်ပြေအောင်ထားချင်တယ် ။ မျက်ရည်ဆိုတာ မင်းပါးပေါ်မှာ ဘယ်တော့မှ မဖြတ်သန်းရလေအောင် ပျော်အောင်ထားချင်တယ် ။ အတ္တလို့ပဲထားပါ ဒါမှမဟုတ် လောဘကြီးလိုက်တာဆိုပြီးပဲ ခေါင်းစဥ်တပ်ပေါ့ ။ တကယ် အဲ့လိုမျိုး မင်းနဲ့ နီးချင်တယ် ။
အဲ့ဒီဆုတွေမှ မပြည့်ရင်လေ ... မင်းနဲ့ အဝေးဆုံးမှာ နေချင်နေမိတော့တယ် ။ ဘာကြောင့်လဲမေးရင်လေ ... မင်းကို မချစ်ရပဲနဲ့တော့ မင်းအနား သူငယ်ချင်းတစ်ယောက်လို မိတ်ဆွေတစ်ယောက်လို နေနိုင်မယ့်အထိတော့ အင်အားတွေမရှိဘူးလေ ဘာမှမဖြစ်သလိုနေပြီး ... မင်းထွက်သွားလဲ အဆင်ပြေပါဆိုပြီး ဖြေနိုင်တဲ့အထိ မျက်ရည်တွေက မခိုင်သေးဘူး ။ ပျော်နေပါပြီဆိုတဲ့ ဘ၀ကို မနှောင့်ယှက်ပဲ နေနိုင်ဖို့ဆို ကိုယ့်ကိုယ်ကိုယ် ထိန်းနိုင်မှ ရမယ်မဟုတ်လား ဒါမှမဟုတ် ကိုယ့်ကိုယ်ကိုယ်မှ မနိုင်ရင် ခဏတော့ ထွက်ပြေးတိမ်းရှောင်ရမယ်မဟုတ်လား ။
ကျွန်တော့်ကို ကျွန်တော် မနိုင်ဘူးလေ ... ဖုန်းနံပါတ်တွေ ဖျက်ထားတာတောင် ဦးနှောက်က မင်းရဲ့ ဖုန်းနံပါတ်တိုင်းကို တစ်ချက်မလွဲပဲ အလွတ်တွေရတယ် ခေါ်မိမှာစိုးလို့ ချေးထားတဲ့ ဘေတွေတောင် ပြန်မဆပ်ပဲ နေခဲ့ရတဲ့အချိန်တွေက သိပ်ပင်ပန်းရတာလေ ။ စာတွေပို့နေမိမှာစိုးလို့ မင်းမရှိတဲ့ acc လေးမှာ နှစ်တွေအကြာကြီး တိတ်တိတ်လေး ပုန်းနေခဲ့တာ ။ ငေးကြည့်တယ် ပြီးတော့ ငိုမိတယ် ။
နောက်ဆုံးမှာ ကျန်ခဲ့ရမှာတဲ့ အမှန်တရားကို ဘယ်လောက်ပဲ မြင်မြင် ကျွန်တော် ခင်ဗျားအနားရှိရင်လေ ခင်ဗျားကို မတွယ်တာနိုင်ပဲ မနေနိုင်ဘူး ပြီးတော့ မချစ်ပဲလဲ မနေနိုင်ဘူး ။ တစ်နေ့နေ့ တိုးလာတဲ့ အချစ်တွေကြားမှာ နောက်ဆုံးကျရင် ကျွန်တော်ပဲ ရူးပြီး ကျန်ခဲ့ရမှာမဟုတ်လား ။ မင်းနဲ့ နီးချင်တယ် ဒါမှမဟုတ် မင်းနဲ့ပဲ ဝေးချင်ပါတယ်ဆိုတဲ့ နှစ်လမ်းထဲက တစ်လမ်းကိုပဲ ရွေးပါတယ် ။
#Credit-to-Owner Writer
(ရင်နှင့်ရင်း၍ရေးသည်)
Comments
Post a Comment