သူ့ကျေးဇူး အထူးသိစေ
••••••••••••••••••••••••
"ကျေးဇူး"ဆိုတာ တစ်ဖက်သားရဲ့ အကြွေး
မိမိမှာ တင်ရှိလျက်က စူးဝင်နေတာကိုဆိုတာပါ။
ဒီနေရာမှာ အနန္တော အနန္တငါးပါးရဲ့
ဂုဏ်ကျေးဇူးက အဓိကပါ။
ဘုရားသည် အကျိုးမဲ့ကို တားမြစ်၍
အကျိုးရှိကို ဖြစ်စေခဲ့တယ်။
တရားသည် အပူကြားမှ ထုတ်ယူပြီး
သက်သာရာကို ပေးခဲ့တယ်။
သံဃာသည်ကား တစ်ဇွန်းစာမျှသော
ဆွမ်းအလှူဖြင့် တစ်ဘဝအကျိုး
တိုးပွားစေခဲ့တယ်။
ရတနာ့ဂုဏ်ဟူသည် ယုံကြည်ရင် ယုံကြည်
သလောက် အကျိုးရောက် ဖြိုးမောက်စေနိုင်
တယ်။
သည်ဂုဏ်ကျေးဇူးတွေ အောက်မေ့ ကြည်ညို
ခြင်းဖြင့် မိမိဂုဏ်လည်း မြင့်မားလာရတယ်။
ရတနာသုံးပါးရဲ့ကျေးဇူးပြီးရင်
မိမိတက်လမ်းကို အားပေးခဲ့တဲ့
ဆရာပညာရှိရဲ့ဂုဏ် မိဘရဲ့ဂုဏ်
ကျေးဇူးများဟာ အဓိကကျတယ်။
ပြီးတော့မှ မိတ်ကောင်းတို့ရဲ့ အားပေး
ကူညီခဲ့ခြင်းဆိုတဲ့ ကျေးဇူးတရားတွေ။
နောက်ဆုံးသိရမယ့် ကျေးဇူးကတော့
အနီးရှိ ကျေးတုံ့နေသူ သားသမီးများနဲ့
သူတို့နှင့်ကောင်းတူ ဆိုးဖက်
ချွေးမတွေနှင့် သမက်တွေရဲ့ ဂုဏ်ကျေးဇူး။
ဒီနေရာမှာ အောက်ကျေးဇူး
သိတတ်ဖို့ လိုလာပါပြီ။
အထက်ကထီး အောက်က ဖိနပ်ကွဲ့။
ထီးရိပ်ခိုပြီး ဖိနပ်မစီးရင်လည်း
ဆူးငြောင့်ခလုပ်များရဲ့ ဒဏ်ကရှိသေး။
မိမိက ပြန်လည်မှီခိုရတဲ့ အလှည့် သားသမီးတို့ရဲ့အောက်ကျေးဇူးကို ငုံ့ကြည့်တတ်ကြပါစေ။
ထမ်းပိုးရုန်းသားထက်
ထမ်းပိုးသိမ်း ချွေးမရဲ့ကျေးဇူး။
အတွင်းကိုင် သမီးထက် အပြင်ပိုင် သမက်
ကျေးဇူးတို့ကို ဆင်ခြင်တတ်ရမယ်။
ငါစွဲကြီးရင် ငါပဲဒုက္ခရောက်မှာ စိတ်ချ။
ပစ္စည်းစွဲ အားကြီးနေရင်လည်း ငါပဲ
ဒုက္ခရောက်မှာ မလွဲဘူး ။
ပုဂ္ဂိုလ်စွဲ အားကြီးနေရင်လည်း ငါပဲ
ဒုက္ခရောက်မှာ ကျိန်းသေပဲ။
ဟိုဘဝ ဒါနပြုစဉ်ကတည်းက ငါစွဲကြီးခဲ့လျှင်
ဒီဘဝ ဒီမိသားစုကြားမှာလည်း ငါမှငါသာ
ဖြစ်တတ်တယ်။
သားနဲ့ချွေးမကြား "ငါ့သား ငါ့သား"နဲ့
ဘက်လိုက်နေတာ ငါစွဲကြီးလို့။
သမီးနှင့်သမက်ကြားမှာလည်း ငါစွဲကြီးနဲ့ ရှုမြင်နေရင် အမှန်မြင်မှာ မဟုတ်ပေဘူး။
ချွေးမဆိုတာ ကိုယ့်ကို
ချွေးမစို့အောင် မမယ့် ချွေးမ။
သမက်ဆိုတာ သားလောက်
မက်ရလို့ သားမက် "သမက်"။
ဒီလိုလည်း ညီညီမျှမျှ
ရှုမြင်တတ်ပါစေ။
ကိစ္စတစ်ခုမှာ ကြိုက်မှု မကြိုက်မှု မသိမှု
ကြောင့် ဆုံးဖြတ်တဲ့ အမူအကျင့်မျိုး ကင်းဖို့လိုပါတယ်။
အဝေးကြည်ညိုမှုထက် အနီးကပ်
ကြည်ညိုခံရဖို့က ပိုခက်တတ်ပါတယ်။
သူတစ်ပါး ကျေးဇူးလည်းသိ ဆပ်လည်း
ဆပ်တတ်မည်ဆိုပါလျှင် ကျေးဇူးတင်ဘဝမှ ကျေးဇူးရှင်ဘဝသို့ ရောက်စေနိုင်တယ်။
ကျေးဇူးသိသူသို့သာ ကျေးဇူးတရား လာရိုး ထုံးစံရှိတယ်။မသိသူမှာ ကျေးဇူးမခံစားရတတ်။
သူ့ကျေးဇူး မမြင်တတ်လို့ ကျေးဇူးကန်းစကား
ပြောမိသော် လုပ်မိသော် မိမိသည် သူ့အောက်
ယုတ်သော သူယုတ်မာဘဝ လှလှကြီး ရောက်
တတ်တယ် ။
သူ့ကျေးဇူးကို ရှာတတ် ကြည့်တတ်ကြပြီး
ကျေးဇူးဆပ်နိုင်ကြပါစေ။
(မဟာဗောဓိမြိုင်ဆရာတော်ဘုရားကြီး)
Comments
Post a Comment