'လောကီအစုတ် လူတို့နှုတ်ကား
မဟုတ်လည်းပြော ဟုတ်လည်းပြော၏၊
မမှန်လည်းပြော မှန်လည်းပြော၏၊
မကောင်းလည်းပြော ကောင်းလည်းပြော၏'
လို့ ရှေးသူတော်ကောင်းများစကားအရ...
လူတို့၏စိတ်ဟာ
တစ်ဦးတစ်ယောက်အပေါ်မှာ
ကောင်းကွက်တွေကို
မျက်ကွယ်ပြုထားတတ်ကြတယ်၊
မကောင်းကွက်တစ်ခုကိုသာ
အမြဲစွဲပြီး သူတစ်ပါးအပြစ်ကို
ဝေဖန်နေတတ်ကြတယ်...။
ဒါသူတော်ကောင်းလက္ခဏာမဟုတ်ဘူး၊
ဗုဒ္ဓဘာသာအစစ်မဟုတ်သေးဘူး၊
ရဟန်းတစ်ပါးကိုဖြစ်စေ,လူတစ်ဦးကိုဖြစ်စေ
ကြည့်တဲ့အခါ အကုသိုလ်ဖြစ်စေသည့်
အာရုံကိုမတွေးသင့်ဘူး...။
မကောင်းသောအမူအရာလေးတစ်ခုနှစ်ခုကို
မျက်လုံးဒေါက်ထောက်ကြည့်နေသူသည်
ဘယ်တော့မှကုသိုလ်မဖြစ်တော့ဘူး၊
အကုသိုလ်သာတိုးပွားနေလိမ့််မယ်၊
နတ်ရွာသုဂတိလမ်းပိတ်ပြီး
အပါယ်ဒုဂ္ဂတိလမ်းပွင့်နေတယ်...။
သတိထားရမှာက ...
ငါ့မှာငါးပါးသီလလုံခြုံရဲ့လား?
ကာယကံသုံးပါးလုံရဲ့လား?
ဝစီကံလေးပါးလုံရဲ့လား?
ချက်ချင်းကိုယ့်စိတ်ကိုယ်စစ်ကြည့်ပါ...။
ဝစီကံတွေမလုံခြုံဘူး၊
သူတစ်ပါးအပြစ်မြင်ဝါဒရှိနေတယ်၊
ကိုယ့်အပြစ်ကိုမရှုဘူး၊
သူတစ်ပါးအပေါ်မှာ မကောင်းတာ
တွေကိုသာ ကြည့်တတ်ပြီး
ကိုယ်မကောင်းတာကို မကြည့်ဘူး...။
ကိုယ့်အိမ်မှာမိသားစုနဲ့ကောတည့်ရဲ့လား?
ဟိုလူ့ဆဲဒီလူ့ဆဲ,သူတစ်ပါးတွေကို
စိတ်တိုင်းမကျဘူး၊
ကိုယ်ကမှအချိုးမကျပါဘဲနဲ့
သူတစ်ပါးတွေအပေါ်အပြစ်မြင်တဲ့သူသည်
'လူမိုက်'ဟု ဘုရားကမိန့်တော်မူတယ်...။
ဒါကြောင့် မိမိအပြစ်ကိုအဖန်ဖန်
ရှုလေ့ရှိသောသူသည်'လူလိမ္မာ'တဲ့၊
ကိုယ့်အပြစ်ကိုမျက်ကွယ်ပြုပြီး
သူတစ်ပါးအပြစ်ကိုသာ
မျက်လုံးဒေါက်ထောက်ကြည့်နေသူသည်
'လူမိုက်' တဲ့...။
ဒါကြောင့်မို့...
ကုသိုလ်ဖြစ်စရာကိုတွေးပါ,ကြံပါ,ပြုပါ၊
အကုသိုလ်ဖြစ်မည့်အပြုအမူတွေကို
မေ့ထားပါ၊
တစ်ဦးတစ်ယောက်အပေါ်
မကောင်းကွက်တွေကိုမတွေးပါနဲ့၊
ကောင်းကွက်လေးတွေကိုသာ
ရှာပြီးတွေးပါ,ကြံပါ,အောက်မေ့ပါ,
ပြုလုပ်ကြံစည်ပါ...။
သူတစ်ပါးအပေါ်အကုသိုလ်ဖြစ်မည့်
အရာဝတ္ထုတွေကိုဘယ်တော့မှ
မကြံစည်,မတွေးတော,မပြုလုပ်မိပါစေနဲ့၊
ဘဝမှာ ကုသိုလ်ဖြစ်စရာတွေကို
များများတွေး,များများကြံစည်ပါ...။
ဘဝကိုအမည်းစက်နှင့်မပြန်မိပါစေနဲ့၊
ဖြူစင်သန့်ရှင်းသောစိတ်ဖြင့်
ကြိုတင်ပြင်ဆင်ထားပါ၊
ဘဝ၏လက်ကျန်အချိန်နည်းနေပါပြီ...။
(မြောက်ဦးဆရာတော်ဘုရားကြီး)
🙏🙏🙏🙏🙏🙏🙏🙏🙏
Comments
Post a Comment