နေပြည်တော်ရှိဈေးများကို လှည့်လည်ကြည့်ရှု့ရာတွင် စည်းကမ်းမလိုက်နာမှုများတွေ့ခဲ့ရဟု ဒေါ်အောင်ဆန်းစုကြည် ပြော
နေပြည်တော်ရှိဈေးများကို လှည့်လည်ကြည့်ရှု့ရာတွင် စည်းကမ်းမလိုက်နာမှုများတွေ့ခဲ့ရဟု ဒေါ်အောင်ဆန်းစုကြည် ပြော
------ ------ ------ ----- -----
နေပြည်တော်ရှိ ဈေးများကိုလှည့်လည်ကြည့်ရှု့ရာတွင် စည်းကမ်းမလိုက်နာမှုများတွေ့ခဲ့ရကြောင်း နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောသည်။
၎င်းက"နေပြည်တော်ဆိုတာ နိုင်ငံရဲ့မြို့တော်ဆိုပြီးတော့ နေပြည်တော်မှာတောင်မှ အဲ့ဒီဈေးတွေမှာ စည်းကမ်းတွေမလိုက်နာတာ တွေ့ခဲ့ရတယ်"ဟုပြောသည်။
ဈေးများအား စနစ်တကျစီမံဆောင်ရွက်ခြင်းနှင့် စပ်လျဉ်း၍ ဆွေးနွေးခြင်း အစီအစဉ် တိုက်ရိုက်ထုတ်လွှင့်မှုကို မေလ ၁၂ ရက်နေ့က ပြုလုပ်ခဲ့သည်။
အဆိုပါ ဆွေးနွေးပွဲတွင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ မြိုင်မြို့နယ်အုပ်ချုပ်ရေးမှူး ဦးသန့်ဇင်ခိုင်၊ ကလောမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဒေါ်ပြုံးကေသီနိုင်၊ နေပြည်တော် ဒုတိယမြို့တော်ဝန် ဦးရဲမင်းဦးတို့က အပြန်အလှန်ဆွေးနွေးခဲ့ကြသည်။
"နေပြည်တော်ကဈေးတွေကို နည်းနည်းလှည့်ပြီးတော့ ကြည့်လိုက်တယ်။ ကြည့်လိုက်တဲ့အခါ ဟိုတစ်နေ့တုန်းက မြို့မဈေးမှာတော့ အခြေအနေသိပ်မကောင်းဘူးဆိုတာတွေ့ခဲ့ရတယ်။ အခြေအနေသိပ်မကောင်းဘူးဆိုတာ လူတွေ စုစုစုစုနဲ့ရှိကြတယ်။ တချို့ တွေကလည်း Mask မတပ်ထားဘူး။ နောက်ပြီး Mask ကိုတပ်ပြီး အောက်ကိုချထားတယ်"ဟု ဒေါ်အောင်ဆန်းစုကြည်ကပြောသည်။
ထို့ကြောင့် ဒဏ်ငွေရိုက်ပြီး Mask တပ်သည့် အလေ့အကျင့်ဖြစ်သွားအောင် လုပ်ဆောင်ရမည်ဖြစ်ကြောင်း ၎င်းကဆိုသည်။
ဈေးများတွင် COVID-19နှင့်ပတ်သတ်သည့် ကိစ္စများကို လော်စပီကာဖြင့် အသံလွှင့်ပေးကြောင်း၊ LED Boardဖြင့် ပြသကြောင်း၊ စည်ပင်ဝန်ထမ်းများက နာရီဝက်တစ်ခါ၊ တစ်နာရီတစ်ခါ Maskတပ်ရန် လှည့်လည်ဆော်ဩကြောင်း နေပြည်တော် ဒုမြို့တော်ဝန် ဦးရဲမင်းဦးကပြောသည်။
၎င်းက"ကျွန်တော်လဲ ဈေးတွေကို နေ့စဉ်ပုံမှန်လိုက်ကြည့်ပါတယ်။ ဘာသတိထားမိလဲဆိုတော့ စည်ပင်ဝန်ထမ်းတွေလာတဲ့အချိန်မှာတော့ တပ်ကြတယ်ပေါ့။ တခါတလေ ရှေ့ပိုင်းမှာ စည်ပင်ဝန်ထမ်းဝင်တဲ့အချိန်မှာကိုပဲ နောက်ကဈေးသည်ကို အချင်းချင်း လှမ်းပြီးအသံပေးတာပေါ့။ လာပြီဟေ့ လာပြီဟေ့ဆိုပြီးတော့ အဲ့တာဆို Mask တွေ အကုန်လုံးပြောင်းပြီး တပ်လိုက်ကြတာပေါ့။ ပြီးရင်တော့ အကုန်လုံးက မေးစေ့ကို ပြန်ဖြုတ်ထားကြတယ်"ဟုဆိုသည်။
ထို့ကြောင့် နောက်ပိုင်းတွင် ဒဏ်ငွေရိုက်ခြင်း သို့မဟုတ် Mask မတပ်လာသည့်နေ့တွင် ဈေးရောင်းချခွင့် မပြုခြင်း၊ Maskဖြုတ်ထားသည်ကို တွေ့ရှိပါက ဈေးရောင်းချခွင့် ရပ်ဆိုင်းခြင်း စသည်ဖြင့် ဆောင်ရွက်သွားရန်ပြင်ဆင်ထားကြောင်း သိရသည်။
လက်ရှိတွင် အခြေအနေကို စောင့်ကြည့်နေပြီး စည်းကမ်းများကို တဖြည်းဖြည်းနှင့် နားလည်ပြီး လိုက်နာပါက လွန်စွာတင်းကြပ်မည်မဟုတ်ပဲ စည်းကမ်းမလိုက်နာမှုများလာပါက တစ်ရစ်ပြီး တစ်ရစ်တင်းကြပ်သွားမည်ဖြစ်ကြောင်း ဦးရဲမင်းဦးကပြောသည်။
#crdဖူးအောင်
Comments
Post a Comment