ရဟန်းတော်များ ဝါဆိုရခြင်း အကြောင်း
🌰🌰🌰🌰🌰🌰🌰🌰🌰🌰🌰🌰🌰
မြတ်စွာဘုရားရှင် ရာဇဂြိုဟ်ပြည် ဝေဠုဝန် ကျောင်းတော်၌ သီတင်းသုံးနေတော်မူစဉ်
ရဟန်းတော်တို့အား ဝါဆိုဝါကပ်ခြင်းကို ပညတ်တော် မမူရသေးသောကြောင့်
ရဟန်းတော်တို့သည် ဆောင်း၊နွေ၊မိုး ဥတုသုံးပါး လုံး ဒေသစာရီအဖြစ် ဟိုဟို ဒီဒီ လှည့်လည် သွားလာကြသော အလေ့ရှိကြကုန်၏။
ထိုသို့ အချိန်ပြည့် သွားလာနေကြသောအခါ
လူအများက…
သာကီဝင်မင်းသား ဘုရားသားတော်များ ဖြစ်ကြကျသော ရဟန်းတော်တို့သည်
အဘယ်ကြောင့် ဆောင်း၊နွေ၊မိုး ဥတုသုံးပါးလုံး
အသက်ရှိသော မြက်ပင်တို့ကို နင်းချေကုန်လျက် (အသက်ရှိသည်ဟု ထင်မြင်ယူဆသောကြောင့်)
သူတစ်ပါးအသက်ဟု ဆိုအပ်သော တစ်ခုသော ဇီဝိတိနြေ္ဒကို ညှဉ်းဆဲကာ သေးငယ်သည့် များစွာသော သတ္တဝါတို့အား ပျက်စီးခြင်းသို့
ရောက်စေပြီး ဟိုဟိုဒီဒီ ဒေသစာရီ လှည့်လည်
သွားလာ နေကြကုန်ဘိသနည်း ...? ။
မိစ္ဆာအယူရှိသော သာသနာပတိတ္ထိတို့သော်မှ လည်း မိုးလတို့ပတ်လုံး ခရီးဟိုဒီမသွားပဲ မိမိတို့နေထိုင်ရာ ကျောင်းအသီးသီးမှာသာ
နေထိုင်ကြကုန် သေး၏။
ငှက်ကလေး တို့သော်မှလည်း သစ်ပင်အဖျားတို့၌
အသိုက်ပြုကာ မိုးလတို့ပတ်လုံး ကြောင့်ကြမဲ့ စွဲမြဲစွာ နေကြကုန်သေး၏။
ဤသာကီဝင်မင်းသား ဘုရားသားတော် ဖြစ်သော ရဟန်းတော်တို့သည်ကား
ဆောင်း၊ နွေ၊ မိုး ဥတုသုံးပါးလုံး စိမ်းရှင်သော မြက်ပင်တို့ကို နင်းချေကုန်လျက် အသက်ဟု ဆိုအပ်သော တစ်ခုသော ဣနြေ္ဒကို ညှဉ်းဆဲကာ
သေးငယ်သည့် များစွာသော သတ္တဝါတို့ကို ပျက်စီးခြင်းသို့ ရောက်စေပြီး ဟိုဟိုဒီဒီ ဒေသစာရီ လှည့်လည် သွားလာနေကြကုန်၏ဟု ကဲ့ရဲ့ကုန်၏။ ရှုတ်ချကုန်၏။အပြစ်ပြ ပြောဆိုကြ ကုန်၏။
ထိုကဲ့သို့ လူတို့၏ ကဲ့ရဲ့ရှုတ်ချ အပြစ်ပြ ပြောဆိုကြသော စကားသံများကို ကြားကြရသောအခါ ရဟန်းတို့သည် မြတ်စွာဘုရားအား ဤအကြောင်းကို
လျှောက်ထား ကြကုန်၏။
ထိုအခါ မြတ်စွာဘုရားသည် ဤအကြောင်းနှင့် စပ်သော တရားစကားကို ဟောတော်မူ၍
ရဟန်းတို့အား…
အနုဇာနာမိ ဘိက္ခဝေ ဝဿံ ဥပဂန္တုံ
ရဟန်းတို့ ဝါကပ်စိမ့်သောငှါ ခွင့်ပြု၏ဟု မိန့်တော်မူ၏ဟူသော မဟာဝါပါဠိတော်လာ ဝါဆိုရခြင်းအကြောင်း ဖြစ်ပါသည်။
မဟာဝဂ္ဂပါဠိ (ဝိနယပိဋက)- ၁၉၂
ဝါဆိုပုံ
🌷🌷🌷🌷
ဣမသ္မိံ ဝိဟာရေ ဣမံ တေမာသံ ဝဿံ ဥပေမိ ဟု
ရွတ်ဆိုရပါသည်။
ဝါဆို ဝါကပ်ခြင်း နှစ်မျိုး
🌻🌻🌻🌻🌻🌻🌻
ဝါဆို ဝါကပ်ခြင်းဟူသည်မှာ…
ပုရိမဝါကပ်ခြင်း၊
ပစ္ဆိမဝါကပ်ခြင်းဟူ၍ နှစ်မျိုးရှိ၍
ဝါဆိုလပြည့်ကျော် တစ်ရက်နေ့၌ ဝါဆို ဝါကပ်ခြင်းကို
▶#ပုရိမဝါကပ်ခြင်း ခေါ်တွင်၍၊
အကြောင်းအားလျှော်စွာ
ဝါဆိုလပြည့်ကျော် တစ်ရက်နေ့၌ ဝါမဆိုလိုက်ရသော
သံဃာများအတွက်
ဝါခေါင်လပြည့်ကျော် တစ်ရက်နေ့၌ ဝါဆိုဝါကပ်ပြုခြင်းကို
▶#ပစ္ဆိမဝါကပ်ခြင်းဟု ခေါ်တွင်ပါသည်၊
ပုရိမိကာ ပစ္ဆိမိကာ။
အပရဇ္ဇုဂတာယ အာသာဠှိယာ ပုရိမိကာ
ဥပဂန္တဗ္ဗာ
မာသဂတာယ အာသာဠှိယာ ပစ္ဆိမိကာ
ဥပဂန္တဗ္ဗာ
ဣမာ ခေါ ဘိက္ခဝေ ဒွေ ဝဿူပနာယိကာတိ။
ထိုကဲ့သို့ ဝါဆို ဝါကပ်ခြင်း နှစ်မျိုးရှိပါသည်။
မဟာဝဂ္ဂပါဠိ (ဝိနယပိဋက)-၁၉၂
တုံ သုံးတုံ
🍁🍁🍁
ဝါဆိုကြသည့် သံဃာများအနေဖြင့်
ဝါတွင်းမှာ မိမိတို့နေထိုင်ရာ ကျောင်းအသီးသီး၌သာ
သီတင်းသုံး နေထိုင်ကြရမည် ဖြစ်ပြီး
ဝါတွင်း၌ မဖြစ်မနေ ခရီးသွားခွင့်ရသည့် အကြောင်းသုံးခုမှာ…
🔹ဒါနဉ္စ ဒါတုံ။
🔹ဓမ္မဉ္စ သောတုံ။
🔹ဘိက္ခု စ ပဿိတုံ ဟူသော အကြောင်းသုံးမျိုး ဖြစ်ပါသည်။
ထိုအကြောင်းသုံးမျိုးဖြစ်သော တုံ သုံးတုံကို
အနုပညတ် ခြွင်းချက်အနေနဲ့ မြတ်စွာဘုရားက ခွင့်ပြုတော် မူခဲ့ပါသည်။
၁။ဒါတုံ=တစ်စုံတစ်ယောက်က အလှူဒါနပြုလုပ်လို၍ ပင့်လျှောက်သောအခါ။
၂။သောတုံ=တစ်စုံတစ်ယောက်က တရားဓမ္မကို ကြားနာလို၍ ပင့်လျှောက်သောအခါ။
၃။ပဿိတုံ=တစ်စုံတစ်ယောက်က ဖူးမြင်လို၍
ပင့်လျှောက်သောအခါ။
ဝါပန်၍ ခရီးသွားနိုင်ပါသည်။
( ၇ )ရက်မတိုင်မီ ပြန်ရောက်ရမည်။
( ၇ )ရက်အတွင်း ဝါဆိုရာ ကျောင်းနေရာသို့ ပြန်ရောက်အောင် လာမည်ဟု ဆုံးဖြတ်၍
စိတ်တွင်းမှသာ ကြံဆ၍ သွားလျှင်လည်း ရပါသေးသည်။
အာဂစ္ဆန္တု အယျာ ဣစ္ဆာမိ
ဒါနဉ္စ ဒါတုံ ဓမ္မဉ္စ သောတုံ ဘိက္ခူ စ ပဿိတုန္တိ။
ဂန္တဗ္ဗံ ဘိက္ခဝေ
သတ္တာဟကရဏီယေန ပဟိတေ န တွေဝ အပ္ပဟိတေ။
သတ္တာဟံ သန္နိဝတ္တော ကာတဗ္ဗောတိ။
မဟာဝဂ္ဂပါဠိ (ဝိနယပိဋက)- ၁၉၄
မဟာဝါ ပါဠိတော်လာ ဝါဆိုခြင်းအကြောင်းကို အကျဉ်း ဖော်ပြပါသည်။
Credit :တိပိဋက မြန်မာပြန်
ဗဟုသုတကျေးရွာ
Comments
Post a Comment